فيلم المصارع هو فيلم مش جديد 2008 .. رشح لجائزتين اوسكار عن اداء مايكى رورك بطل الفيلم واداء ماريسا تومى البطلة , والحقيقة ان انا ماشوفتوش فى وقتها مع ان كل النقاد اشادوا بأداء مايكى روروك , لأنى قلت ان ده فيلم رياضة وقصة بطولة وكفاح وحاجة كده شبه النمر الأسود وانا مش باحب الافلام دى وخاصة انه ماترشحش لجوايز تانية .. مخرج الفيلم هو المخرج دارين أرونفسكى صاحب الفيلم فائق الشهرة نشيد جنائزى حلم 2000 ( واسف على الترجمة) .. لكن فيلم المصارع فى رأيى أقوى من الفيلم التانى وسبب قوته جاى من النقط اللى هاقولها حالاً ...المهم .. لما شفت فيلم الرجل الحديدى 2 لفت انتباهى جداً اداء مايكى رورك وحسيته ابرز اداء فى الفيلم , وبعدين لقيته تانى فى الفيلم السخيف بتاع سلفستر ستالون ( القابلون للإستغناء عنهم 2010 .. واسف تانى ع الترجمة) , عجبنى المشهد اللى كان عامله فى الفيلم وقررت اتفرج على درة أعماله الحديثة وهو فيلم المصارع .
من أول لحظة والفيلم بيبهرك ببساطته ومصداقيته ولآخر لحظة , الايقاع مظبوط جدا ما بين سرعة الاحداث و هدوء الواقع , يعنى حركات الكاميرا وقطعات المونتاج مافيهاش سرعة الأفلام الاكشن التقليدية بالنسبة لموضوع الفيلم – اللى هو المصارعة الحرة أكيد - ومافيهاش بطء الأفلام الواقعية الممل .. فبينقل لك صورة فى غاية المصداقية لفيلم درامى فى الدرجة الأولى ..
أداء مايكى رورك فى الفيلم مميز جداً , من أقل حركة بينقل كل اللى عايز يقوله مع ان الحوار فى الفيلم مش كتير .. حركاته كمصارع فى الفيلم كأنه محترف قضى حياته فى المصارعة الحرة وليه أسلوب ( مش كان بيروح الجيم عشان فيه فرق هيعرفه أى حد شاف مصارعة حرة قبل كده ) .. ماريسا تومى أدائها بينافس أداء البطل فى الجمال , وزيها زيه طالعة فى دور راقصة تعرى (ستريبر) وحركاتها كمان مدروسة وتلقائية كأنها قعدت طول عمرها فى الشغلانة ..
السيناريو بسيط ومباشر جداً , وطريقة الأخراج المميزة لدارين أرونفسكى بتدى الأفلام الأبعاد اللى هو عايز يقولها .. الأحداث بتمشى بشكل تلقائى لدرجة انى سألت نفسى فى نص الفيلم هو عايز يقول ايه .. عشان افاجيء فى العشر دقايق الأخيرة بتتابع النهاية البليغ جداً واللى بيوضح كل السيناريو وينهيه بشكل مبهر ..
لكن أهم ما فى الفيلم واللى يخليه نقطة مضيئة فى تاريخ اللى عملوه وفى رأيى أحلى من (نشيد جنائزى لحلم ) .. المصداقية .. الحاجة اللى بنفتقدها فى تسع اعشار افلامنا ومسلسلاتنا اللى بتتفرج عليها تحس ان كأنك شايف الكاميرات والإضاءة والمخرج ومتأكد من جواك ان دى ناس بتمثل من غير أى معايشة من أى نوع .. هنا بقى بيتعامل مع الموضوع كأنه حقيقة مطلقة , ديكور معبر جداً وبالذات فى نوادى المصارعة , ونادى التعرى اللى بيقابل فيه حبيبته ( خدوا على الترجمة بقى) .. اضاءة منطقية اكتر منها فذلكة , يعنى مش هتلاقى باك لايت ساطع احمر , ولا ريم لايت أخضر ولا كونتر اعلى فتحتين من إضاءة الوش , تفاصيل تفاصيل التفاصيل معتنى بيها , ماكياج الجروح والضرب , البوسترات والتى شيرتات , الفيديو جيم اللى فيها البطل ايام مجده .. كأنهم قعدوا يبنوا حياة كاملة للراجل ده عشان ينقلوها فى الساعة ونص .. والنتيجة مذهلة طبعاً .. تحب الفيلم او ماتحبوش , مش هاتقدر تبقى مش مستمع بالفرجة على حاجة فيها كمية التفاصيل الضخمة والبساطة فى نفس الوقت ..معانى المفردات :
نشيد جنائزى لحلم
Requiem for a dream 2000
المصارع
Wrestler 2008
القابلون للإستغناء عنهم
The Expendables 2010
الفيلم متاح للتحميل من خلال التورنت , من اللينك ده
0 comments:
Post a Comment