رف السينما 2 .. فيلم ميمنتو .. حدوتة كريستوفر نولان

وقفت كتير وانا بافكر فى الفيلم اللى المفروض اكتب عنه لكريس نولان , رصيتهم قدامى على الكومبيوتر وحاولت أنقى اكثرهم تعبير عن هوية المخرج واتجاهه و اكثرهم غرابة واجدرهم بالمشاهدة .. المخرج البريطانى كريستوفر نولان ليه أفلام اشتهرت والناس عارفينها وهو الفيلموجرافيا بتاعته لحد دلوقتى سبع أفلام بس , وهما بالترتيب:

- Following 1998  - Memento 2000   - Insomnia 2002 (Starring Al Pacino)  - Batman Begins 2005   - the Prestige 2006    - The Dark 

 Knight 2008   - Inception 2010

فيلم ارق معروف لأنه بتاع ال باتشينو , افلام بات مان الجديدة معروفة جداً , فيلم برستيج وفيلم انسيبشن كمان مشهورين .. اتبقى قدامى فيلمين .. تتبع 1998 وهو الفيلم الطويل الأول فى حياة كريس نولان , وميمنتو 2000 وهو الفيلم اللى حققله شهرته وفى نفس الوقت أغرب أفلامه سرديا ... وفى النهاية قررت أكتب اكتر عن ميمنتو وجواه نتكلم عن باقى الأفلام

فيلم ميمنتو 2000 ( وترجمته الحرفية عن اللاتينية تذكير , وتستخدم بمعنى ملحوظات للتذكرة) .. هو الفيلم 35 مللم  الأول فى اعمال المخرج البريطانى الأمريكى كريستوفر نولان , واللى قدر يحصل على التمويل بتاعه من تبرعات لمها من جماهير المهرجانات اللى عرض فيها فيلمه الطويل الأول تتبع 1998 , اللى كان متصور 16 مللم وابيض واسود كمان .. فيلم تتبع كان فيلم تشويقى معمول تقريباً بدون انتاج خالص فى بيوت واماكن حقيقية مش ديكور وبعدد ممثلين محدود جداً وكان هو اللى كاتب قصته ومصوره وممنتجة وعامل كل حاجة فيه بنفسه , لكن الفيلم بسبب السيناريو الذكى جداً والحبكة الرائعة قدر يلم من الناس التبرعات اللى تخليه يعمل فيلمه التانى اللى كتبه عن قصة قصيرة لأخوه الأصغر بنفس اسم الفيلم.

اشتهر كريس نولان بعد كده فى كل افلامه  بالتشويق والحبكات المعقدة , وبتسلسل السرد الغير تقليدى .. يعنى يبدأ الفيلم من نصه ويرجع ورا ويطلع قدام براحته جداً بحيث يخدم فكرة التشويق ويخليك طول الوقت مشدود وبتفكر .. واشتهر كمان بشخصياته المختلفة اللى استفاد من دراسة الأدب الأنجليزى فى خلقها , و عشان كده اخترت اكتر فيلم بتتحقق فيه الصفات دى , لدرجة انه اتكتب فيه دراسات درامية محترمة جداً , وحالاً هنقول ليه ..

بس قبل ما نخش فى اللى جاى لازم اقول ان الكلام هياخد طابع علمى عجيب ع السينما , فاللى فايق يركز .. وعشان اثبتلكو هنبدأ حالاً بشرح مصطلحين مترجمين عن الروسية فى وصف الدراما

Fabula and Sujet

وبحسب المعنى المفهوم من المصطلحين هاحولهم لمعانى عربى هى ( الزمن الحقيقى , وزمن الفيلم ) .. المقصود ان الزمن الحقيقي هو الزمن الخام لحدوث الأحداث نفسها , والزمن فى الفيلم هو طريقة تقديمها للناس .. مثال : فيلم بيبدأ بحادثة بيموت فيها ناس , وبعدين الفيلم بيحكى قصة حياة الناس دى ووصلوا ازاى للحادثة .. ده اسمه الزمن فى الفيلم .. انما الزمن فى الحقيقة بيبدأ من ولادتهم لحد ما ماتو فى الحادثة , يعنى لو تطابق الاتنين يبقى المفروض موتهم فى الحادثة اخر مشهد فى الفيلم خالص..

ممكن ترجمة اكثر اختصار للمصطلحين تبقى ( الحدث والسرد) .. والمصطلحين دول مهمين فى فهم بناء الفيلم , السرد أو كيفية تقديم الأحداث فى الفيلم مبنى على خطين زمنيين , واحد ملون والتانى بالأبيض والأسود .. بيتقاطعوا بالتبادل .. الخط الزمنى الأبيض والأسود هو احداث مرتبة بالترتيب الزمنى لحدوثها , الخط الزمنى الملون مرتب عكس الترتيب الزمنى ( من الحدث الأجدد للحدث الأقدم) .. الخط الزمنى الأبيض والأسود كله ترتيبه قبل حدوث الخط الزمنى الملون فى الزمن الحقيقى أو زمن الحدث ..

الرسم البيانى أو الشكل اللى بيوضح ده , هو شكل عمله الكاتب اندى كلاين فى مقالة فى مجلة صالون , وهو رتب الخط الأبيض والأسود بأرقام من 1 الى 22 , ورتب الخط الزمنى الملون بالحروف من ( ايه) الى (فى) ... وده عشان يساعد اللى مافهموش حاجة من الشرح اللى فات (كتر خيره ) .. فبقى ترتيب مشاهد الفيلم كالتالى .. 1, فى , 2 , يو , 3, تى , 4 , اس ..... 22 , ايه , التترات ..

الرسم اللى موجود هنا فى النوت صغير , فياريت نضغط على الشكل وهيروح للينك يظهر فيه بحجم أكبر , ويا جماعة محدش يتخض من الرسم ويدعى عليا , ده رسم لتبسيط الفيلم , مش شرح لنظرية فيزيائية ولا حاجة ..

وبمناسبة اللينكات , ده مقال للكاتب ستيفانو جيزلونى يعتبر من أحسن المقالات اللى اتكتبت حوالين الفيلم وبيشرح فيه ازاى كريس نولان ادى للمشاهد مجموعة من الدلائل اللازمة عشان يقدر يتفرج على الفيلم بالترتيب الملخبط ده ويفضل فاهم ومهتم ومتابع الأحداث .. وبالمناسبة المقال معقد نسبياً لكن بيقول كلام عظيم جداً ..

http://dinamico2.unibg.it/fa/fa_mem01.html

طب كل التعقيد الدرامى فى السيناريو ده ليه ؟! .. الفكرة مش فى الفذلكة ومش محاولة لإستعراض العضلات الفكرية , الموضوع ببساطة هو المعايشة مع قصة الفيلم .. الفيلم بيدور حوالين شخص مصاب بفقدان ذاكرة مؤقت بينسى الحاجات اللى حصلت قبل ربع ساعة , وبالتالى المخرج الكاتب قرر يحطنا فى مكان البطل ويعرض الفيلم بالمقلوب بحيث نلاقى نفسنا كل شوية فى موقف عارفين نهايته بس مش عارفين بدايته .. منتهى العبقرية وبساطة الفكرة وتعقيد التنفيذ !

طبعاً , اللى عارف الفيلم اكيد فاهم كويس اللى انا باتكلم عنه , واللى ماشافوش غالباً هيكون مافهمش برضه الفيلم عامل ازاى بالظبط .. وعشان كده بالذات انا اخترت الفيلم ده عشان يبقى تانى نوت نتكلم فيها , الفيلم بيعتبر طفرة فى طريقة السرد بتاعته , وبداية لشكل جديد من الأشكال السينمائية اللى اتخصص فيها المخرج والكاتب ده فيما بعد .. وعشان كده انا مش هاتكلم المرة ده على التمثيل ولا الديكور ولا الإضاءة ولا كل الحاجات دى ..

دى دعوة لكل محبى السينما لمشاهدة فيلم ميمنتو بس عشان الحبكة السردية والإخراج اللى بيخدم الحبكة دى , ولولا انه هيبقى مطلب صعب , اتمنى كلنا كمان نشوف باقى افلام المخرج ده لأن كل واحد فيهم فيه جزء ابداعى زى كده .. و بالذات فيلم تتبع 1998 عشان نشوف ازاى انتاج اقل من الفقير وكاميرا 16 ملم ممكن تعمل فيلم جميل , وفيلم انسيبشن 2010 لأنه حالياً فى السينمات وقريب هيكون على دي فى دى وعلى الانترنت .. وشكراً ..

الفيلم متاح للتحميل من خلال التورنت , من اللينك ده

http://www.kickasstorrents.com/memento-2000-dvdrip-eng-imacruel1-t767981.html

فيلم تتبع 1998 للمخرج والمؤلف نفسه متاح من اللينك ده

http://www.kickasstorrents.com/following-1998-ac3-fs-dvdrip-divx-ziggy-subs-pl-t478875.html

وده اسم المخرج عشان اللى عايز باقى الأفلام

Christopher Nolan