رف السينما 11.. نادى القتال , حدوتة ديفيد فينشر و تشاك بولانيك

فيلم نادى القتال 1999 لا ينطبق عليه ولا شرط من الشروط المعتادة لوجوده ضمن هذه النوتس .. وهو كمان من السينما الأمريكية فى كل حاجة (الانتاج والموضوع وأسلوب الإخراج) , النوع من السينما اللى كنت باحاول اتجنبه فى الأفلام المختارة لحد دلوقتى لفتح الطريق لأفلام أكثر غرابة وتنوع وأحياناً افضل فنياً وأجرأ من السينما الأمريكية اللى بتتحكم فيها رؤوس الأموال الهوليوودية وحجم الصناعة العملاق ..

ولكن الفيلم ده تحديداً ظروفه مختلفة , و من أهم الأسباب لظهور فكرة نوتس رف السينما أساساً كان التعريف بالفيلم ده وكام فيلم غيره , وعلى الرغم من شهرته الفائقة , وثقتى إن معظم اللى هيقرا النوت هيكون شاف الفيلم أو سمع عنه كتير .. الا إن الكلام عن فيلم زى نادى القتال بيفتح المجال للكلام عن تلات حاجات مهمة , الصدمة الإجتماعية فى السينما, والمخرج ديفيد فينشر , وروايات تشاك بولانيك و اتجاه المينيماليزم .. وعلى قد ما الكلام يبان معقد إلا انه بسيط ومهم للمهتمين بالسينما الحديثة أو الأدب العالمى ...

بطل الفيلم (مالوش إسم فى الرواية ولا الفيلم) هو نموذج الطبقة المتوسطة للمواطن الأمريكى , على حد كلام الرواية والفيلم هما الجيل اللى ربتهم أمهاتهم والتليفزيون (بسبب الطلاق أو انشغال الأب فى العمل) , ووعدهم التليفزيون بأنهم لما يكبروا هيبقوا نجوم ومشاهير ومطربين وممثلين ولاعبى كرة .. ووصلوا لسن الثلاثين ليكتشفوا الحقيقة ويفقدوا إيمانهم بكل اللى اتربوا عليه .. (نوعاً ما نموذج ممكن ينطبق على العالم كله) .. البطل هنا موظف فى شركة تأمين , و عبد للحاجات اللى اشتراها واللى عايز يشتريها , ماشى فى ساقية الحياة المعاصرة وهوس الإمتلاك لدرجة ان بيته فى الفيلم نموذج من كتالوج لمجلات الديكور اللى عنده .. مصاب بالأرق وبيلف على مجموعات علاج أمراض هو مش مصاب بيها بس عشان يقعد مع المرضى ويلتمس فيهم الدفء والحرارة الإنسانية اللى بتخليه يقدر ينام ويواصل حياته .

بيوصل الخلاص فجأة على يد الشخصية الفوضوية اللى البطل بيقابله صدفة (تايلر دوردن) واللى بيمثل كل حاجة عكس بطل الفيلم .. ومع بعض بيؤسسوا مجموعة علاج من نوع خاص تحت مسمى (نادى القتال) .. ومش هاتكلم أكتر عن قصة الفيلم عشان ماحرقهاش ..

فيلم ورواية نادى القتال نموذج لما يمكن أن يطلق عليه فن الصدمة الإجتماعية أو الصدمة البرجوزاية .. وده مصطلح فرنسى قديم لوصف الفن اللى بيثير حالة من الصدمة للطبقة الإجتماعية المتوسطة بالطعن فى مفاهيمها ومسلماتها وإطلاعها على الجانب الفاسد فيها , واضح من فلسفة الفيلم سخط المخرج والمؤلف على حياة النمط الأمريكى .. ومن الممكن تلخيص فكرته بأن (المجتمع الأمريكى من خلال تناقضاته يهدم نفسه بنفسه) , هى دى الفكرة المجردة اللى بدأ بيها صناع الفيلم وتنطبق على قصة الفيلم زى ما هنشوف بشكل حرفى تماماً .. النوع ده من الأفلام ومن الفن عموماً عنده الصدمة قيمة وهدف فى حد ذاته , وبيختلف عن أفلام الرعب الدموية مثلاً فى أنه بيجيب الصدمة لحد عندك فى فيلم إجتماعى, مش انت بتروحلها فى فيلم رعب فتكون مستعد ليها .. ويكفى ان نعرف ان الفيلم فعلاً أثر فى ثقافة المواطن الأمريكى لدرجة إن الشرطة قفلت عدة (أندية قتال) فتحت بعد عرض الفيلم تأثراً به !

ديفيد فنشر من المخرجين المهمين جداً فى الجيل الجديد فى السينما الأمريكية , وينافس أسماء تقترب منه فى المرحلة العمرية زى البريطانى العبقرى (كريس نولان) .. وفيلم نادى القتال فى رأيى أهم أفلام المخرج ديفيد فينشر , ولكن عند كثير من الجمهور ينافس الفيلم عناوين هامة أخرى للمخرج مثل (سبعة 1995) , و الفيلم الملحمى (الحالة الغريبة لبنجامين بوتون 2008) ومؤخراً الفيلم الذى أراه فعلاً جدير بتلك المنافسة (الشبكة الإجتماعية 2010) واللى بيتكلم عن موقع الفيس بوك ومؤسسه ويعرض حالياً فى السينمات فى مصر , وواضح من العناوين اللى فاتت الدويتو ما بين مخرج الفيلم و الممثل (براد بيت) اللى هو البطل فى فيلمنا بدور (تايلر دوردن) مع إدوارد نورتون والفنانة غريبة الأطوار هيلينا بونهام كارتر ..

بعد مشاهدتى للفيلم لأول مرة من حوالى خمس سنين أثار فضولى جداً عالم الروائى تشاك بولانيك , فقرأت رواية (نادى القتال) بترجمة أحمد خالد توفيق , وبعدها تابعت أهم اعماله من خلال الانترنت وقرأت بعضها بلغته الأصلية .. تشاك بولانيك هو نجم روائى حديث , غزير الإنتاج كعادة الكتاب الأمريكيين (عشان بيكتبوا على جداول منتظمة) .. وكل سنة تقريباً له إصدار جديد .. أهم مميزات أسلوبه هو إتباعه لمذهب المينماليزم , وهو مذهب تشكيلى أساساً وانتقل للأدب فيما بعد .. وزى ما بيظهر من أسمه هو مذهب لتلخيص كل شيء للحد الأدنى , سطور الحوار فى الرواية , وصف الأبطال, المشاعر المختلفة وحبكة القصة .. وبالتالى فقصصه سريعة الإيقاع جداً وحبكاتها دائماً جديدة وملتوية , شخصياته غير تقليدية معظم الوقت ويكتب عن أنماطاً غير مطروقة من المجتمع و غالباً منحرفة التفكير والشعور وكثيراً ما يفضل أن يتركهم بدون أسماء , من أفضل ما قرأت له ويعبر عن أدبه رواية (سناف 2009) , وهى تدور حول نجمة أفلام جنسية تقوم بعمل فيلم أخير لمحاولة إستعادة نجوميتها الضائعة ويحتوى على عدد كبير من الممثلين , وتدور الرواية ما بين أربعة رواه مختلفين فى خطوط متوازية خلال يوم تصوير ذلك الفيلم وصولاً لنهاية الرواية المأساوية .. وعلى قدر ما يبدو موضوع الرواية غريباً ومنفراً , إلا أنها فعلاً قطعة أدبية جميلة ومختلفة وأنصح من يمكنه القراءة بالإنجليزية بقراءتها ..

التصوير والمونتاج والموسيقى والإخراج الفنى فى الفيلم أوركسترا متجانسة جداً لعزف سيمفونية روح العصر الحديث من وجهة نظر مخرجه .. الإيقاع السريع بالرغم من طول زمن العرض , موسيقى الروك والميتال واللى بتبدأ من تترات الفيلم , الجرافيك المثير والموحى فى التترات وعلى مدار الأحداث , الصورة بألوانها ما بين الأخضر والأزرق فى درجات غير مريحة للعين غالباً وحركات الكاميرا السريعة .. الديكورات والأماكن الخارجية فى الفيلم طول الوقت ما بين الليل والبدرومات والمطابخ والحجرات الخلفية الصدئة وإضاءات النيون الباردة ..

عبقرية من كل صناع العمل فى خلق جو غير مريح وعنيف وقاس .. أداء هيلينا بوناهام كارتر كالعادة متألق وبالذات فى تمثيل الشخصيات المختلة نفسياً ( هى زوجة المخرج تيم برتون اللى هو برضه مختل نفسياً) , براد بيت يخرج كما عودنا عن دور الشاب الوسيم ليمثل فى أداء من أحلى أدواره .. وإدوارد نورتون اللى مابحبش تمثيله فى المعتاد فى نفس الوقت بيثير انبهارى كل مرة أشوف الفيلم ده , السيناريو اللى قدر يوصل لمناطق جديدة من الرواية كاتبها نفسه ماكنش منتبه ليها (زى ما هو قال للصحافة) وخرج كل ما هو غريب ومتنافر من الشخصيات وعلاقتها ببعضها .. الرومانسية التايهة فى كل اللى فات ده وتعاطفك مع الشخصيات الفارغة نفسياً وهى تنكشف لك طول الفيلم .. إبداع ..

كل اللى فات ده مجرد تقديم بسيط لفيلم من الأفلام المفضلة جداً بالنسبة لى , هو فى قايمة موقع (أى إم دى بى) ترتيبه السبعتاشر فى قائمة أفضل مائة فيلم فى العالم بتصويت زوار الموقع .. وعندى هو من أفضل خمس أفلام .. وغالباً عند أى حد هيتفرج عليه هيقفز لأعلى قائمة أفضل أفلامه , أو على أقل تقدير هيستمتع بسينما فنياً رائعة وتقنياً مثيرة .. بدون إطالة الكلام من غير داعى , بأنصح كل من لديه ساعتين فاضيين فى أى يوم ليه بتحميل الفيلم من على النت ومشاهدته فوراً ..

معانى المفردات

سناف

Snuff

تشاك بولانيك

chuck palahniuk

الحالة الغريبة لبنجامين بوتون

The Curious Case of Benjamin Button

موقع (أى إم دى بى)

http://www.imdb.com/