رف السينما 8 .. كالنجوم على الأرض , رحلة فى أحلام الأطفال

على الرغم من عدم التفضيل الشخصى للسينما الهندية (اللى بيوصل لدرجة للجهل التام بمستحدثاتها) , الا انه ماينفعش نتجاهلها بأى شكل لو جينا نعمل رصد للخريطة السينمائية فى العالم .. يمكن كمان بعد توزيع جوايز الأوسكار لسنة 2009 وفوز الفيلم البريطانى الهندى مليونير العشوائيات للمخرج دانى بويل بثمانية جوايز مرة واحدة , بقى عندنا مؤشر لأن مستقبل استثمارات صناعة السينما الأمريكية ممكن يوجهها ناحية السينما الهندية (وطبعاً بالذات مع التعداد السكانى العملاق للهند والدول المتابعة للأفلام الهندية عموماً) .. بسرعة وثقة اهتمت الهند بصناعتها السينمائية وصنعت لنفسها أهمية تحت مسمى (بوليوود) اللى انتشر فى العالم كله , وهو تنويع هندى على مدينة (هوليوود) الشهيرة فى أمريكا .

مصطلح (بوليوود) كمصطلح سينمائى بيطلق خطأ على الأفلام الهندية فى العموم , لكن الغرض الحقيقى منه هو الأفلام الناطقة باللغة الهندية تحديداً لأن فى أفلام هندية ناطقة بالأوردية والانجليزية .. سوق الفيلم الهندى (بوليوود بالتحديد) بسبب ضخامته وأقبال دول كاملة زى دول الخليج على أفلامه , صنع حالة من التكرار والتجارية فى الأفلام مشابهة لصناعة السينما الأمريكية (اللى بيشوف الأفلام الأمريكية سهل يلاحظ تكرار التيمات والأفكار والأساليب لغرض ارضاء جمهور معين) .. لكن اختيارى من السينما البوليودية كان لازم يختلف عن وجهة نظرنا التقليدية للسينما الهندية (الاستعراضات والقصص العاطفية الغير منطقية ومغامرات أكشن فريد شوقى ) .. فاخترت فيلم (كالنجوم على الأرض 2007) للمخرج أمير خان (أو عمير خان) .

الفيلم هو التجربة الإخراجية الاولى للممثل الهندى أمير خان , وبيقدم لنا وجهة نظر فريدة من نوعها جداً .. الطفل الفاشل دراسياً صانع المشكلات اللى بيهرب من المدرسة وبيسقط وهو لسه فى ابتدائى , وجهة نظر البطل المحطم نفسياً شفناها كتير فى أفلام للكبار بتتكلم عن الفشل ومحاولات اصلاح الحياة والوحدة والإحباطات العاطفية .. لكن تبنى شخصية فاشلة محبطة لطفل كان فكرة موفقة .. بيحكى الفيلم قصة إيشان طالب فى تالتة ابتدائى كل حياته رسومات والوان ولعب وتأمل فى الطبيعة , لكن من الناحية الدراسية هو فاشل تماماً وبيعيد السنة ومشاغب والأدهى انه مش مهتم بالمدرسة ولا النجاح ولا التفوق .. وده بيخلى أهله يضطروا يبعتوه لمدرسة داخلية عشان يتربى ..

سيناريو الفيلم اكتر من رائع , مع ان الموضوع نفسه مش جديد , الا ان براعة السيناريو فى انه بياخدك بسهولة من المناطق المتوقعة فى كل حدث لمناطق جديدة ودفعات شعورية مختلفة, استخدام الأغنيات كجزء من السرد أضاف للفيلم جداً.. الحوار كان بالنسبة لى ركيك نسبياً وإن كان الحكم صعب بسبب الفروق بين اللغات .. أمير خان كمخرج كان شجاع جداً فى أسلوبه , مزج الرسوم المتحركة بالمشاهد الاجتماعية بأغنيات البوب لعمل الفيلم كان مفاجأة بالنسبة لى من مخرج لسه فى أول أفلامه .. الفيلم مفيهوش دلالات ولا اشارات على مستوى أعمق من الحدث نفسه فمش مجهد على الإطلاق فكرياً , لكن أسلوب المخرج والمؤلف المتنوع , والقصة المقسومة بالنص بين الطفل وبطل الفيلم (هونفسه المخرج) بيدفعك للتأمل فى الشخصيات من زوايا ووجهات نظر مختلفة , من خلال لقطات كتيرة احياناً بتكون شبه تسجيلية بتقطع سرد الفيلم وبتسيب للمشاهد الفرصه للتفكير .. والطبيعى ان الفيلم طوله وصل الى 165 دقيقة .. وبيحتوى على مقطع تسجيلى فى النهاية لأطفال حقيقيين تم التصوير معاهم للتعرف عليهم اكتر والدخول جوا احلامهم وافكارهم ..

والفيلم فى قصته بيفكرنى بفيلم تليفزيونى رائع آخر هو (قصة رون كلارك 2006) بطولة ماثيو بيرى واخراج راندا هاينس , الاتنين بيتكلموا عن مدرس وعلاقته بالطلبة , الفيلمين بيأخدوا الأمور بعمق وبساطة بعيدين عن السطحية والمواقف المصطنعة اللى بتميز النوع ده من الأفلام .. وانصحكوا بالفرجة على الفيلم ده برضه ..

من أفضل ما فى فيلم (كالنجوم على الأرض) الرؤية الموسيقية للمخرج .. التناسق ما بين الأغنيات (المكتوبة والملحنة بشكل جميل واللى بتتنوع ما بين اللغة الانجليزية والهندية) والصورة المقدمة على الشاشة للأغنيات دى , بتخلى الفيلم فى بعض أجزاء منه وكأنه فيديو كليب بيحكى قصة وبيختصر مسافات من السرد البصرى , وفى أحياناً تانية بتكون مجرد مصاحبة للحدث فى ميل للميلودرامية .. والتناسق بين الأغانى والصورة ده أكيد مش جديد بالنسبة لأنه فيلم هندى , ده بيعتبر من الخصائص اللى احنا عارفين ان السينما الهندية بتشتهر بيها , لدرجة انى بحس ان الهنود فعلاً فى المدرسة بيتعلموا الرقص والغنا مش اى حاجة تانى .. بس مع ذلك كانت تجربة سماع اغانى الراب الهندية حاجة مش هتتنسى بسهولة (وهاضحك عليها كتير) .

أداء الطفل بطل الفيلم (دارشيل سفرى) كان فى بدايات الفيلم محير بالنسبة لى , لكن مع مرور الوقت بتتضح طاقات الأداء المبهرة للطفل الصغير وقدرته ملامح وشه على اظهار الاحساس واحياناً اللا احساس زى ما مطلوب فى الفيلم بالظبط , أداء أمير خان نفسه فى دور مدرس الرسم الوسيم أبو طريقة حديثة وعقل متفتح , شفاف ونقى وطيب ويقدس الحياة الزوجية (كعادة الأبطال فى الأفلام الهندى والعربى) .. كان مش بطال , مناسب جداً فى الاستعراضات والأغانى ومعظم المشاهد لكن صعب مقارنته بأداء الطفل الصغير أو حتى بقدراته كمخرج للفيلم .

وفى الآخر .. عمرى ما كنت فى يوم من الأيام مغرم بالسينما الهندية ومن الواضح انى عمرى ما هاكون , ولسه باشوف أفلام زى مليونير العشوائيات على انها افلام (هندى) .. وفى مشاهد زى مشهد دخول مدرس الرسم لأول مرة فى الفيلم بيفكرنى بمسرحيات فيفى عبده .. لكن بالتغاضى عن الشويتين (الهندى) فى الموضوع الأغنية نفسها اللى بيغنيها لما يدخل كلماتها رائعة وبتلخص موضوع الفيلم تقريباً .. و الموضوع كله محاولة من صانعى الفيلم للدخول فى عالم الأطفال , جوه افكارهم اللى مش بيقدروا يعبروا عنها قدام تسلط الكبار فى هيئة الأهل أو المدرسين , واعتبار انفسهم عارفين ايه اللى فى مصلحة الطفل وايه لأ .. وبيقدم حل فلسفى جميل وبسيط بأن السبيل لفهم عالم الأطفال هو الرجوع للطفولة والبراءة اللى جوانا ولو من وقت للتانى .. صورة سينمائية ناضجة بشكل كبير واستعراضات هندية مسلية وملونة والمئات من لقطات الأطفال والجناين والألوان والرسومات , افتكر مفيش بعد كده ..