رف السينما 12.. حكايات نيويورك , و تداخل ثلاث مدارس فى السينما الأمريكية

فيلم أمريكى من سنة 1989 مكون ثلاث مقاطع على شكل قصص قصيرة وكأنها ثلاث أفلام قصيرة غير مترابطة , تجمع بينهم فقط تيمة الفيلم وهى المدينة (نيويورك) .. المقاطع الثلاثة من إخراج مخرجين من أشهر مخرجى هوليوود وأقواهم تأثيراً فى تاريخ السينما بالمعنى الحرفى للكلمة وهو المحير فى الموضوع .. فمن أسبوع لم يكن عندى علم بوجود الفيلم ده على الإطلاق على الرغم من متابعتى لأعمال المخرجين التلاتة من فترة مش قصيرة ! وتعبت على ما لقيت نسخة على الانترنت وجودتها دى فى دى ولكن متوسطة .. آراء النقاد عليهم فى مواقع الإنترنت متضاربة وتشير لعدم التحمس الفيلم ! فى نفس الوقت يستحيل على أى وضع إن المخرجين التلاتة دول بالذات مايطلعش من عندهم ولو مقطع واحد من التلاتة جميل جداً .. يمكن يكون عدم الوحدة أو الترابط بين الأفلام التلاتة هو سبب تضارب الآراء ؟ أو هو عدم التوافق بين المخرجين شوش على الموضوع ككل ؟ .. إحساس كل مخرج من التلاتة إن فى ناس تانية معاه فى الفيلم يمكن أثر على طريقة تنفيذهم للفيلم وإخراجهم فطلع بصورة مختلفة عن المعتاد منهم ؟! ..

أى كانت الأسباب فماكنش ينفع على أى حال بالنسبة لى أو حتى بالنسبة لكم قراء هذه النوتس , أن يفوتنا رؤية الفيلم ده ولو حتى اختلفنا عليه بعد كده , لأنه ببساطة من إخراج المخرجين التلاتة (بترتيب مقاطع الفيلم) .. مارتن سكورسيزى , وفرانسيس فورد كوبولا , وودى آلن ..

رف السينما 11.. نادى القتال , حدوتة ديفيد فينشر و تشاك بولانيك

فيلم نادى القتال 1999 لا ينطبق عليه ولا شرط من الشروط المعتادة لوجوده ضمن هذه النوتس .. وهو كمان من السينما الأمريكية فى كل حاجة (الانتاج والموضوع وأسلوب الإخراج) , النوع من السينما اللى كنت باحاول اتجنبه فى الأفلام المختارة لحد دلوقتى لفتح الطريق لأفلام أكثر غرابة وتنوع وأحياناً افضل فنياً وأجرأ من السينما الأمريكية اللى بتتحكم فيها رؤوس الأموال الهوليوودية وحجم الصناعة العملاق ..

ولكن الفيلم ده تحديداً ظروفه مختلفة , و من أهم الأسباب لظهور فكرة نوتس رف السينما أساساً كان التعريف بالفيلم ده وكام فيلم غيره , وعلى الرغم من شهرته الفائقة , وثقتى إن معظم اللى هيقرا النوت هيكون شاف الفيلم أو سمع عنه كتير .. الا إن الكلام عن فيلم زى نادى القتال بيفتح المجال للكلام عن تلات حاجات مهمة , الصدمة الإجتماعية فى السينما, والمخرج ديفيد فينشر , وروايات تشاك بولانيك و اتجاه المينيماليزم .. وعلى قد ما الكلام يبان معقد إلا انه بسيط ومهم للمهتمين بالسينما الحديثة أو الأدب العالمى ...

رف السينما 10 .. الزمن الباقى , لوحة سيريالية فى ذاكرة الفلسطينى

تنويه : تبدأ فعاليات مهرجان القاهرة السينمائى الدولى الرابع والثلاثون يوم الثلاثاء الموافق 30 نوفمبر وتستمر لمدة تسعة أيام .. لعمل الكارنيهات (للطلبة والنقابات الفنية) يتم التوجه لمقر إدارة المهرجان فى ميدان طلعت حرب (فى عمارة قصاد البنك اللى هناك , روحوا واسألوا) .. الكارنية تكلفته 30 جنيه ويسمح لحامله بحضور العروض الصحفية والندوات فى الأماكن والتوقيتات المبينة على ظهر الكارنية .. لمعرفة معلومات اكتر عن الأفلام المشاركة ممكن تزوروا الموقع الرسمى للمهرجان

http://www.cairofilmfest.org/

يختلف فيلم هذه النوت عن باقى الأفلام السابقة من عدة جوانب , أوضحها طبعاً أنه الفيلم العربى الأول .. لكن أهمها هى اللغة التى يتعامل بها , والطرح اللى بيتناول من خلاله أفكاره , معتادى مسرح العبثية ممكن بسهولة يفهموا اللغة دى ويتعاملوا معاها .. ولكن بالنسبة لمعظم المتفرجين الموضوع أشبه بلغة بتتعلمها من بداية الفيلم لحد ما تتقنها قرب نهايته .. أسلوب الفيلم نفسه ممكن يقسم لأجزاء مشابهة لتقسيم الفيلم الدرامى ..

عنوان الزمن الباقى عنوان ملتف لا يمكن ادراك معناه الحقيقى ولكن يمكننا تخمينه .. الزمن الباقى قد يكون سؤال عن ما سيبقى لنا من زمن على هذه الحالة , وممكن ( وده الأفضل فى رأيى) فهمه على أنه لمحات أو مشاهد فى ذاكرة المؤلف والمخرج الذاتية عن عالمه الماضى , واللمحات دى هى ما بقى له من ذلك الزمن المنقضى وهى الزمن الباقى المخلد فى هذا الفيلم ..

رف السينما 9.. عن الرجال والآلهة .. فيلم العيد

من أروع الأفلام اللى شاهدتها هذه السنة , وقد قاربت على الانتهاء , هو الفيلم الفرنسى عن الرجال والآلهة 2010 للمخرج كزافييه بوفوا .. أصداء سمعة الفيلم وصلت لى فى البداية من مهرجان كان لهذا العام , حيث فاز الفيلم بالجائزة الكبرى للجنة التحكيم وهى الجائزة الثانية فى المهرجان, واترشح للجايزة الأولى (السعفة الذهبية) ولكنها كانت من نصيب الفيلم التايلاندي (العم بونمي الذي يمكنه تذكر حيواته الماضية) واللى بيدور فى عالم الأرواح واستنساخها وبمعرفة أن لجنة التحكيم السنة دى كان بيرأسها المخرج الأمريكانى (تيم برتون) .. ممكن نستنتج ان ده كان عامل فى حصول الفيلم على الجايزة لأن كلنا عارفين علاقة (برتون) القوية بعوالم الأشباح والخيالات ..

يطلق على الفيلم روائياً من الناحية التصنيفية , لكنه يأخذ من السينما التسجيلية معظم أدواته ووسائل تأثيره , ويقف بالظبط فى المنطقة الفاصلة بين الصورة التسجيلية والدراما الواقعية .. والأفضل انه يعتبر فيلم تسجيلى أعيد تمثيل أحداثه بسبب عدم التمكن من تصويرها وقت حدوثها .. خاصة انها أحداث واقعية حصلت فى عام 1996 ولا دور لخيال المؤلف فى نسج الخطوط العريضة للفيلم ..وقصة الحادثة الحقيقية والفيلم بسيطة ..

رف السينما 8 .. كالنجوم على الأرض , رحلة فى أحلام الأطفال

 على الرغم من عدم التفضيل الشخصى للسينما الهندية (اللى بيوصل لدرجة للجهل التام بمستحدثاتها) , الا انه ماينفعش نتجاهلها بأى شكل لو جينا نعمل رصد للخريطة السينمائية فى العالم .. يمكن كمان بعد توزيع جوايز الأوسكار لسنة 2009 وفوز الفيلم البريطانى الهندى مليونير العشوائيات للمخرج دانى بويل بثمانية جوايز مرة واحدة , بقى عندنا مؤشر لأن مستقبل استثمارات صناعة السينما الأمريكية ممكن يوجهها ناحية السينما الهندية (وطبعاً بالذات مع التعداد السكانى العملاق للهند والدول المتابعة للأفلام الهندية عموماً) .. بسرعة وثقة اهتمت الهند بصناعتها السينمائية وصنعت لنفسها أهمية تحت مسمى (بوليوود) اللى انتشر فى العالم كله , وهو تنويع هندى على مدينة (هوليوود) الشهيرة فى أمريكا .

مصطلح (بوليوود) كمصطلح سينمائى بيطلق خطأ على الأفلام الهندية فى العموم , لكن الغرض الحقيقى منه هو الأفلام الناطقة باللغة الهندية تحديداً لأن فى أفلام هندية ناطقة بالأوردية والانجليزية .. سوق الفيلم الهندى (بوليوود بالتحديد) بسبب ضخامته وأقبال دول كاملة زى دول الخليج على أفلامه , صنع حالة من التكرار والتجارية فى الأفلام مشابهة لصناعة السينما الأمريكية (اللى بيشوف الأفلام الأمريكية سهل يلاحظ تكرار التيمات والأفكار والأساليب لغرض ارضاء جمهور معين) .. لكن اختيارى من السينما البوليودية كان لازم يختلف عن وجهة نظرنا التقليدية للسينما الهندية (الاستعراضات والقصص العاطفية الغير منطقية ومغامرات أكشن فريد شوقى ) .. فاخترت فيلم (كالنجوم على الأرض 2007) للمخرج أمير خان (أو عمير خان) .

رف السينما 7 .. الحياة باللون الوردى

بالاسم اللى كله تفاؤل ده (الصغيرة) و اللى اتغير بعد كده لـ (الحياة باللون الوردى 2007) للعرض فى أمريكا والعالم ..  بيحكى لنا المخرج (أوليفييه داهان ) قصة الحياة القصيرة الصاخبة للمطربة الأشهر فى تاريخ فرنسا (إديت بياف) , اديت بياف لها فى فرنسا مكانة أم كلثوم فى العالم العربى , وأغانيها وبالذات (الحياة باللون الوردى) أشهر من أن تعرف .. وان كان فيلم عمارة يعقوبيان ساهم فى تعريف الجمهور المصرى بأغنية أخرى لها وهى (الزحام) .. سهل تسمع أغنيات اديت بياف فى أى فيلم بيتكلم عن فرنسا أو حتى فى العاب فيديو مشهورة زى (ميدالية الشرف) اللى بتدور أحداثها فى فرنسا الحرب العالمية الثانية بتسمع الأغنية فى الخلفية .. ولدت فى سنة 1951 وماتت عن عمر 48 سنة بسرطان الكبد وجنازتها قفلت شوارع باريس بجمهور المحبين ..

الفيلم بيقدم لينا شكل من أشكال البايوجرافى , أو السيرة الذاتية .. ولكن بطريقة تختلف عن الطريقة التقليدية , مش بيهتم يظهر قصة حياة المطربة المشهورة بشكل شامل لكافة الجوانب وبالتفاصيل بتتابع دقيق , قد ما هو بياخدها مثال لقصة صعود فنانة وبيشتغل عليه بشكل فنى مالوش علاقة بالتاريخ .. بمعنى ان الفيلم مابيغرقناش بتفاصيل لشخصيات تاريخية احنا مانعرفش عنها حاجة لمجرد انها كانت موجودة فى حياة البطلة (سواء ملحنين أو شعرا أو سياسيين معاصرين) , هو بيركز أكتر على مشاهد متفرقة من حياتها بتجتمع عشان تصنع أسطورتها الغنائية وقصتها مع الحياة , بيتجاهل كمان الجانب السياسى من حياة اديث بياف (اللى اتقال ان كان ليها دور فى المقاومة الفرنسية) وبيكتفى بالجانب الفنى .. وده من خلال سياق سردى غير خطى بالمرة بشكل متشابه مع الموجود فى فيلم (حليم) لشريف عرفة ( اللى بانصحكم تشوفوه بالمناسبة لأنه فيلم ناضج ) .. والفيلم حاصل على جوايز أكتر من أنها تذكر هنا بس أهمها أوسكار أفضل ممثلة وأفضل ماكياج .

رف السينما 6 .. وقت القاهرة .. قصيدة سينمائية فى حب مصر بالانجليزى

فيلمنا لهذه النوت فيلم من دولة على الرغم من قلة انتاجها الفنى .. الا انهم كل فترة بيقدمولنا نوع مميز جداً من السينما الهادية اللى تناسب العرض فى المهرجانات ولا تدعى الأهمية ولا الملحمية .. من اربع سنين قدمت لينا فيلم (واجب وطنى)  2006, واللى شارك فى بطولته خالد أبو النجا بدور البطولة الثانية .. والسنة اللى فاتت قدمت لنا السينما الكندي فيلم وقت القاهرة 2009 (وأعذرونى على الترجمة الحرفية ,لأن الأنسب هو أيام فى القاهرة .. بس مابحبش الفتى فى الترجمة) .. طبعاً ما نقدرش نحصر انتاج السينما الكندية فى الأفلام اللى بتتكلم عن العرب , لكن هى ده النقطة المحورية فى النوت دلوقتى ..

والفيلم ده مع أنه ناطق باللغة الانجليزية الا انه اكيد مافيش حد شافه قبل كده إن كان فى حد سمع عنه أساساً !! .. اتعرض فى عدة مهرجانات وأخد جايزة أفضل فيلم كندى طويل فى مهرجان تورنتو , على الرغم من أن الفيلم بيدور فى عاصمة مصرنا الحبيبة الا ان للأسف مفيش حد تعب نفسه وقرر يشاورلنا عليا (حتى مش لازم يعرضوه فى السينما) واحنا نتفرج عليه بمعرفتنا .. وفى المقابل قلبوا الدنيا من سنتين على الفيلم الأمريكى الهايف (أحبك يا رجل) 2008 عشان خاطر لقطة يتيمة ذكروا فيها السادات بشكل مسيء .. وبالرغم من حداثة انتاج الفيلم الا انه خلاص بعد دورة المهرجانات السنوية تراجع تماماً توطئة لأنه يختفى على الرف وكأن لم يصنع .

رف السينما 5 .. مدينة الرب .. أحلامك بإزاحة معارضيك على بعد ماسورة مسدسك

على الرغم  من الشهرة العالمية المدوية لفيلم مدينة الله (أو مدينة الرب) 2002 , إلا ان شروط النوتس بتنطبق عليه حرفياً لأنه كان عندى ع الرف بقاله سنتين وشفته مؤخراً بناءاً على نصيحة من صديق ... بافتتاحية جذابة جداً ومثيرة للانتباه , وأسلوب تصوير يخدعك من البداية فتحس انك قدام فيلم هواه .. يبدأ الفيلم البرازيلى مدينة الله أولى مشاهدة بمطاردة عبثية بين فرخة هربت من عشة فراخ وجمهور من سكان المدينة من مختلف الأعمار بالمسدسات والبنادق الآلية , اللى بيضربوا فعلاً منها نار على الفرخة اللى بتجرى بأسرع طاقتها .. بينتهى الصراع العبثى ده ببطل الفيلم اللى لقى نفسه فى موقف لا يحسد عليه وهو بيبدأ يحكيلنا إزاى ممكن صورة تؤدى للموقف العجيب ده.

الفيلم مأخوذ عن رواية واقعية لباولو لينز, ومن أخراج اتنين من المخرجين هما فرناندو ميرييه وكاتيا لند .. اترشح لعدد من جوايز الأوسكار وعرض فى كتير من المهرجانات المهمة وحقق نجاح كبير بالرغم من أنه فيلم مستقل .. من أول بداية الفيلم سهل تدرك أن المخرجين من البرازيل بسبب اختيارهم للقطات وبالذات فى الفوتومونتاج اللى بيجمع مناظر فى المدينة , لقطات تعريفنا بالمكان بتدل على حب أصيل أكتر منه مجرد تسجيل , أو اعجاب من عين فنان بالجماليات اللى ممكن تبقى فى فوضى العالم التالت .. بتختلف نظرة المخرجين عن نظرة السياح التقليدية اللى بنلاقيها فى أى فيلم أكشن بتدور جزء من أحداثة فى بلد زى البرازيل وبيحتاج المخرج يعمل مشهد تمهيدى للمدينة .. بيدور الفيلم فى حى عشوائى للاقليات بجوار ريو دى جانيرو فى حقبة السبعينات , الزنوج ماليين الفيلم لدرجة تحسسك انه بيحصل فى دولة افريقية ما .. ومن حين للتانى بتشوف لمحات من مجتمع ريو دى جانيرو البعيد تماماً عن قصة الفيلم ويبدو سعيداً ومتطوراً كأنه بلد تانى زى ما بنشوف فى مشاهد مقر الجريدة مثلاً ..

رف السينما 4 .. بانز لابيرينث .. متاهة نفسية وطفولة ناضجة وفيلم مذهل الى آخر دقيقة

من غير أى مقدمات .. الفيلم المكسيكى الناطق بالأسبانية متاهة بان 2006 هو فخر الصناعة المكسيكية الأسبانية , حائز على جايزة السعفة الذهبية فى مهرجان كان , واترشح لست جوايز أوسكار اخد منهم تلاتة (التصوير والإخراج الفنى والماكياج) وماخدش تلاتة ( احسن سيناريو واحسن موسيقى واحسن فيلم أجنبى) .. وبالتالى فواضح ان الفيلم كويس , وواضح انه مهم سواء بالنسبة للناس اللى بتحب السينما وعايزة تتفرج على فيلم ماتنساهوش بسهولة , أو بالنسبة للمصورين اللى اكيد هيهتموا بالجوانب الفنية فى الصورة المبدعة للفيلم ..

كنت عايز احط الفيلم ده كأول فيلم فى سلسلة النوتس , لكن الفيلم كان أتقل من ان يتم تناوله كأول فيلم واحنا لسه بنسخن , وخصوصاً ان الفاشية الاسبانية مش من الموضوعات اللى الواحد يتكلم فيها قبل ما يسخن .. مبدئياً الفيلم مش سياسى , الفيلم بيدور فى سنة 1944 والحرب العالمية التانية لسه ماخلصتش , المانيا وايطاليا فى عداد المنتصرين ونازلين بهدلة فى العالم على المستوى الخارجى .. على المستوى الداخلى احداث الفيلم فى أسبانيا بعد خمس سنين من نهاية الحرب الأهلية الأسبانية وفى شبه ثورة ضد النظام اللى كان موجود وقتها ..

رف السينما 3 .. بيرسيبوليس .. التجربة الذاتية فى مقابل تقنيات الحبكة

فيلم برسيبوليس 2007 هو فيلم فرنسى ايرانى للكتابة والرسامة الإيرانية مارجان ساترابى , مبنى على الأوتوبايوجرافى المرسوم والمنشور ليها كقصة مصورة على كذا جزء بنفس الإسم , الفيلم فاز بجايزة لجنة التحكيم فى مهرجان كان , ورشح لجايزة أفضل فيلم رسوم متحركة فى الأوسكار .. من اخراج كاتبة الفيلم , والمخرج الفرنسى فينسينت باروناود ..

فى النوت الأولى اخترت فيلم واقعى جداً , بطله التمثيل البديع ودقة التفاصيل عشان اقول ان مش لازم قصة كبيرة ولا اضواء وانتاج و .. و.. عشان يطلع فيلم عظيم .. فى النوت التانية اخترت فيلم ذو حبكة وسيناريو معقدين وتكنيك كتابة واخراج يعتبر تطور مهم فى الدراما الأجنبية , عشان اقول ان الفيلم التشويقى هو أكتر من مطاردات عربيات وقصص متشعبة بدون داعى ... فى النوت التالتة اخترتلكم فيلم رسوم متحركة , عشان اقول ان فى افلام رسوم متحركة مش للأطفال أساساً وبالعكس الأطفال لو شافوها ممكن يكتئبوا او يجيلهم تخلف عقلى

رف السينما 2 .. فيلم ميمنتو .. حدوتة كريستوفر نولان

وقفت كتير وانا بافكر فى الفيلم اللى المفروض اكتب عنه لكريس نولان , رصيتهم قدامى على الكومبيوتر وحاولت أنقى اكثرهم تعبير عن هوية المخرج واتجاهه و اكثرهم غرابة واجدرهم بالمشاهدة .. المخرج البريطانى كريستوفر نولان ليه أفلام اشتهرت والناس عارفينها وهو الفيلموجرافيا بتاعته لحد دلوقتى سبع أفلام بس , وهما بالترتيب:

- Following 1998  - Memento 2000   - Insomnia 2002 (Starring Al Pacino)  - Batman Begins 2005   - the Prestige 2006    - The Dark 

 Knight 2008   - Inception 2010

فيلم ارق معروف لأنه بتاع ال باتشينو , افلام بات مان الجديدة معروفة جداً , فيلم برستيج وفيلم انسيبشن كمان مشهورين .. اتبقى قدامى فيلمين .. تتبع 1998 وهو الفيلم الطويل الأول فى حياة كريس نولان , وميمنتو 2000 وهو الفيلم اللى حققله شهرته وفى نفس الوقت أغرب أفلامه سرديا ... وفى النهاية قررت أكتب اكتر عن ميمنتو وجواه نتكلم عن باقى الأفلام

رف السينما 1 .. فيلم المصارع .. المصداقية .. المصداقية .. المصداقية ..

فيلم المصارع هو فيلم مش جديد 2008 .. رشح لجائزتين اوسكار عن اداء مايكى رورك بطل الفيلم واداء ماريسا تومى البطلة , والحقيقة ان انا ماشوفتوش فى وقتها مع ان كل النقاد اشادوا بأداء مايكى روروك ,  لأنى قلت ان ده فيلم رياضة وقصة بطولة وكفاح وحاجة كده شبه النمر الأسود وانا مش باحب الافلام دى وخاصة انه ماترشحش لجوايز تانية .. مخرج الفيلم هو المخرج دارين أرونفسكى صاحب الفيلم فائق الشهرة نشيد جنائزى حلم  2000 ( واسف على الترجمة) .. لكن فيلم المصارع فى رأيى أقوى من الفيلم التانى وسبب قوته جاى من النقط اللى هاقولها حالاً ...

المهم .. لما شفت فيلم الرجل الحديدى 2 لفت انتباهى جداً اداء مايكى رورك وحسيته ابرز اداء فى الفيلم , وبعدين لقيته تانى فى الفيلم السخيف بتاع سلفستر ستالون ( القابلون للإستغناء عنهم 2010 .. واسف تانى ع الترجمة) , عجبنى المشهد اللى كان عامله فى الفيلم وقررت اتفرج على درة أعماله الحديثة وهو فيلم المصارع .

من أول لحظة والفيلم بيبهرك ببساطته ومصداقيته ولآخر لحظة , الايقاع مظبوط جدا ما بين سرعة الاحداث و هدوء الواقع , يعنى حركات الكاميرا وقطعات المونتاج مافيهاش سرعة الأفلام الاكشن التقليدية بالنسبة لموضوع الفيلم – اللى هو المصارعة الحرة أكيد -  ومافيهاش بطء الأفلام الواقعية الممل .. فبينقل لك صورة فى غاية المصداقية لفيلم درامى فى الدرجة الأولى ..

التدوينة الأولى

 رف السينما

تدوينات عن الأفلام السينمائية .. لكن الأفلام اللى مش حديث الساعة , يمكن افلام مش معروفة , أفلام قديمة , افلام من بلاد مش مشهورة بالسينما بتاعتها .. المهم انها غالباً هتكون أفلام على الرف من اللى ممكن تقعد عند الواحد سنين ومايتفرجش عليا .. هناخدها وننفض التراب , ونتكلم ..

نشرت هذه التدوينات للمرة الأولى على فترات متباعدة شكل نوتس على موقع الفيسبوك منذ سبتمبر 2010 وحتى الآن , ثم تم نقلها للمدونة فيما بعد...